तनहुँ । पृथ्वी राजमार्गको बिस्तार तथा मर्मत कार्यसँगै सवारी दुर्घटनाका घटनामा वृद्धि हुन थालेको छ। तीव्र गति र चालकको लापरवाही दुर्घटनाको प्रमुख कारणका रूपमा देखिएको छ।
यसै क्रममा बुधबार तनहुँको म्याग्दे गाउँपालिका–गुणादी क्षेत्रमा एक कार आफैँ अनियन्त्रित भई दुर्घटनामा परेको छ। काठमाडौँतर्फ जाँदै गरेको बा ४ च २२३९ नम्बरको सुजुकी कार तीव्र गतिका कारण नियन्त्रण बाहिर गई सडकमा पल्टिँदा दुर्घटना भएको प्रारम्भिक अनुमान गरिएको छ।
दुर्घटनामा कारमा सवार व्यक्तिहरू सामान्य घाइते भएका छन्। घाइतेहरूको अवस्था सामान्य रहेको र स्थानीय स्वास्थ्य संस्थामा उपचार गरिएको प्रहरीले जनाएको छ। दुर्घटनापछि कार सडकमै पल्टिएको अवस्थामा रहँदा केही समय यातायात प्रभावित भएको थियो।
हाल पृथ्वी राजमार्गको विभिन्न खण्डमा सडक बिस्तार, मर्मत तथा निर्माण कार्य जारी रहेकाले सवारी चलाउँदा विशेष सतर्कता अपनाउन प्रहरीले आग्रह गरेको छ। निर्माणाधीन सडक, अस्थायी डाइभर्सन, धुलो तथा चिप्लो सतहका कारण जोखिम बढेकाले तीव्र गति नगर्न र ट्राफिक नियमको पूर्ण पालना गर्न अनुरोध गरिएको छ।
सुरक्षित यात्राका लागि सबै सवारी चालकले जिम्मेवार र सावधान ड्राइभिङ गर्नुपर्ने सरोकारवालाहरूको भनाइ छ।
