अछाममा बेहोस भई काठमाडौं ल्याइएका पत्रकार दिनेश सिटौलाको निधन

काठमाडौं । अछामबाट बेहोस अवस्थामा काठमाडौं ल्याइएका पत्रकार दिनेश सिटौलाको उपचारका क्रममा निधन भएको छ । राष्ट्रिय स्वतन्त्र पार्टीका वरिष्ठ नेता बालेन्द्र शाहको चुनावी अभियानका सिलसिलामा अछाम पुगेका सिटौला अचानक बेहोस भएपछि नेपाली सेनाको हेलिकप्टरमार्फत काठमाडौं ल्याइएको थियो ।

उपचारका लागि उनलाई काठमाडौंस्थित ग्राण्डी अन्तर्राष्ट्रिय अस्पतालमा भर्ना गरिएको थियो । अस्पतालमा उपचारकै क्रममा आइतबार दिउँसो उनको निधन भएको अस्पताल स्रोतले जनाएको छ ।

सिटौला गत शुक्रबार अछाममा रहँदा अचानक बेहोस भएका थिए । उनको स्वास्थ्य अवस्था गम्भीर बनेपछि तत्काल उद्धार गरी काठमाडौं ल्याइएको थियो । चिकित्सकहरूले उनको उपचारका लागि प्रयास गरे पनि ज्यान बचाउन नसकिएको जनाइएको छ ।

यसैबीच, सिटौलाको निधनलाई लिएर कतिपय पक्षले शंका व्यक्त गरेका छन् । घटनाको कारणबारे स्पष्ट विवरण सार्वजनिक नभइसकेको अवस्थामा सामाजिक सञ्जाल र केही वृत्तमा विभिन्न अड्कलहरू भइरहेका छन् । यद्यपि, आधिकारिक निकायबाट निधनको कारणबारे कुनै निष्कर्ष सार्वजनिक गरिएको छैन ।

सिटौलाको निधनले पत्रकारिता क्षेत्र र राजनीतिक वृत्तमा शोक छाएको छ । उनका सहकर्मी, शुभेच्छुक तथा विभिन्न संघ संस्थाले श्रद्धाञ्जली व्यक्त गर्दै परिवारप्रति समवेदना प्रकट गरेका छन् ।

घटनाबारे थप विवरण आउन बाँकी रहेको र सम्बन्धित निकायबाट आधिकारिक जानकारी प्राप्त भएपछि मात्र वास्तविक कारण स्पष्ट हुने बताइएको छ ।