काठमाडौँ, पुस २७ गते ।
राष्ट्रनिर्माता पृथ्वीनारायण शाहको ३०४ औँ जन्मजयन्ती तथा राष्ट्रिय एकता दिवस आज देशभर विविध कार्यक्रम गरी मनाइँदैछ । आधुनिक नेपालको एकीकरण अभियानका नेतृत्वकर्ता शाहको योगदानको स्मरण गर्दै विभिन्न स्थानमा श्रद्धाञ्जली कार्यक्रम आयोजना गरिएको छ ।
यस अवसरमा सिंहदरबार पश्चिम मूलद्वारस्थित राष्ट्रनिर्माताको सालिकमा पुष्पहार अर्पण गरी सम्मान व्यक्त गरिएको छ । तत्कालीन गोरखाका राजा पृथ्वीनारायण शाहले जनताको सहयोग र सहभागितामा छरिएर रहेका बाइसे–चौबिसे राज्यलाई एकीकृत गर्दै आधुनिक नेपालको आधार निर्माण गर्नुभएको थियो ।
उहाँको एकीकरण अभियानले राष्ट्रिय स्वाधीनता र सार्वभौमिकता संरक्षण गर्ने बलियो जग बसालेकै कारण नेपाल विश्वका पुराना स्वतन्त्र राष्ट्रमध्ये एक रहन सफल भएको हो । विसं १७७९ मा जन्मनुभएका शाहले २० वर्षको उमेरमा गद्दी आरोहण गरी आन्तरिक तथा बाह्य चुनौतीलाई परास्त गर्दै एकीकरण अभियान अघि बढाउनुभएको थियो ।

शासनकालमा दिनुभएका ‘घूस लिने र दिने दुवै राष्ट्रका शत्रु हुन्’ जस्ता दिव्योपदेश आज पनि सुशासन र भ्रष्टाचार न्यूनीकरणका सन्दर्भमा उत्तिकै सान्दर्भिक मानिन्छन् । भौगोलिक अवस्थालाई संकेत गर्दै उहाँले नेपाललाई ‘दुई ढुङ्गाबीचको तरुल’ को संज्ञा दिनुभएको थियो ।
पछिल्ला वर्षमा सरकारद्वारा पुस २७ गते पृथ्वी जयन्ती तथा राष्ट्रिय एकता दिवसका रूपमा सार्वजनिक बिदा दिने परम्परा पुनः सुरु गरिएको छ । शाहको जन्मस्थान गोरखामा हरेक वर्ष विशेष कार्यक्रम आयोजना गरिन्छ । यस अवसरमा राष्ट्रका विभिन्न विशिष्ट व्यक्तित्वहरूले शुभकामना सन्देश दिएका छन् ।
नेपाली सेनाले पनि सैनिक मुख्यालय जङ्गीअड्डा परिसरमा रहेको पूर्णकदको सालिकमा माल्यार्पण गरी श्रद्धाञ्जली अर्पण गरेको छ । राष्ट्रनिर्माताका दिव्योपदेशलाई पाठ्यपुस्तकमा समावेश गर्नुपर्ने माग विभिन्न सङ्घसंस्थाले गर्दै आएका छन् । पृथ्वीनारायण शाहको विसं १८३१ मा ५२ वर्षको उमेरमा निधन भएको थियो ।