काठमाडौं : नेपाली कांग्रेसका महामन्त्री गगनकुमार थापाले विशेष महाधिवेशनमा हजारौंको संख्यामा उपस्थित प्रतिनिधिहरूको भेलालाई हल्का रूपमा नलिन आग्रह गरेका छन्। भृकुटीमण्डपमा जारी बन्दसत्रलाई सम्बोधन गर्दै उनले यो भेला टिकट र भागबण्डाका लागि गरिएको भन्ने हल्ला फैलाइएकोप्रति आपत्ति जनाए।
“यो त टिकट र भागबण्डाका लागि गरिएको हो भनेर हल्ला फैलाइएको छ। यसले उनीहरूले हाम्रो कुरा बुझेकै छैनन् भन्ने पुष्टि गर्छ,” उनले भने, “हामीलाई सभापति चाहिँदैन भनिरहेका छौं, टिकट चाहिँदैन भनिरहेका छौं। त्यसैले हजारौं प्रतिनिधिहरू सहभागी भएको विशेष महाधिवेशनलाई हल्का रूपमा नलिऔं।”
महामन्त्री थापाले प्रक्रिया अघि बढिसकेकाले अब निर्णय बन्दसत्रको हलले गर्ने स्पष्ट पारे। विशेष महाधिवेशनमार्फत सिंगो कांग्रेसलाई थप उज्यालो बनाइएको दाबी गर्दै उनले पार्टीप्रति भरोसा अझ मजबुत बनेको बताए।
“हामीले सभापति, कार्यवाहक सभापति, जिल्ला सभापतिहरू सबै यहीँ छन् भनेर मानेर छलफल गरिरहेका छौं,” उनले भने, “नआएका कसैले उभिएर विशेष महाधिवेशनले कांग्रेसलाई हानी गर्यो भन्न सक्छ भने भनोस्। हामीले हानी गरेका छैनौं, कांग्रेसलाई थप उज्यालो बनाएका छौं।”
थापाले दिवंगत नेता प्रदीप गिरीको भनाइ स्मरण गर्दै कांग्रेस गुट होइन, गिरोहको दिशामा गएको टिप्पणी गरिएको उल्लेख गरे। बन्दसत्रमा महामन्त्रीद्वय गगनकुमार थापा र विश्वप्रकाश शर्माले प्रस्तुत गरेका प्रतिवेदनहरू पारित भएका छन्।
