काठमाडौँमा वैदेशिक रोजगारको नाममा ठगी प्रकरण फेरि एकपटक सतहमा आएको छ। फिल्म ‘तेल भिसा’का निर्माता शिवराज कार्की अहिले वैदेशिक रोजगार विभाग को थुनामा छन्। उनी लामो समयदेखि फरार रहँदै आएका थिए र अन्ततः स्वयम्भू क्षेत्रबाट पक्राउ परेका हुन्।

प्रहरीका अनुसार कार्कीले चाबहिलमा ‘पि एण्ड एम इनोभेटिभ सर्भिस’ नामक कन्सल्टेन्सी सञ्चालन गर्दै सर्वसाधारणलाई सर्बिया, ग्रिस र अजरबैजान पठाउने प्रलोभन देखाएर ठूलो रकम असुलेका थिए। एक जनाबाट १ लाखदेखि २० लाख रुपैयाँसम्म लिएको प्रारम्भिक अनुसन्धानले देखाएको छ।

उपत्यका अपराध अनुसन्धान कार्यालयका एसपी मनोहर भट्ट का अनुसार कार्की भारतबाट नेपाल आएको सूचनाको आधारमा पक्राउ गरिएको हो। उनी केही समयदेखि नयाँ दिल्ली को पहाडगञ्ज क्षेत्रमा ‘अन्नपूर्ण फास्टफुड’ सञ्चालन गर्दै बसेको समेत खुलेको छ।

हालसम्म करिब १०० जना पीडित प्रहरीको सम्पर्कमा आइसकेका छन् भने करिब २५० जनासम्म ठगिएको आशंका गरिएको छ। अनुसन्धानमा संलग्न डीएसपी अनिल घिमिरे ले उनको नाममा भारतीय आधार र प्यान कार्डसमेत फेला परेको बताएका छन्।

कार्कीविरुद्ध वैदेशिक रोजगार ठगीसँगै बैंकिङ कसुरका मुद्दासमेत दर्ता भइसकेका छन्। अहिले वैदेशिक रोजगार विभाग ले अदालतबाट म्याद लिएर थप अनुसन्धान गरिरहेको छ।

यो घटनाले वैदेशिक रोजगारीको नाममा हुने ठगी अझै पनि गम्भीर समस्याको रूपमा रहेको स्पष्ट पारेको छ।