नेपाल –  अपाङ्गता भएका महिला, बालिकाविरुद्ध हुने लैङ्गिक हिंसा र आघात व्यवस्थापनसम्बन्धी पाँच दिने ट्रमा काउन्सेलिङ तालिम सुरु भएको छ । नेपाल अपाङ्गता महिला सङ्घद्वारा आयोजित सो तालिममा विभिन्न परिस्थितिका कारण अपाङ्गता हुन पुगेका व्यक्तिको सहभागिता रहेका छ ।

तालिममा उनीहरुले भोग्नु परेको विभेद्, हिंसा र यसबाट उत्पन्न हुने मानसिक स्वास्थ्य समस्यालाई कसरी व्यवस्थापन गर्न सकिन्छ भन्ने जानकारी दिइने सहजकर्ता कञ्चन रावतले जानकारी दिनुभएहो छ  ।

उहाँले भन्नुभयो,’जीवन सधैँ सोचे जस्तो हुँदैन, सोच्दै नसोचेका कतिपय घटना दुर्घटनाले मानिसको जीवनले फरक मोड लिन्छ, त्यसलाई स्वीकार्न मानिसलाई निकै गाह्रो हुन्छ मानसिक समस्या देखिन्छन् ।’

जीवन भोगिरहेका अपाङ्गता भएका महिलालाई उदासी र नैराश्यताबाट टाढा रहेर कसरी सकारात्मक रुपमा सार्थक जीवन जिउने भन्ने विषयमा तालिम प्रदान गरिने बताउनुभएको छ  ।

सेवाग्राहीको प्रारम्भिक अवस्थाको मनोविज्ञान अध्ययन गरेर सेवा प्रदायकले सोही आधारमा प्रभावकारी सेवा प्रदान गर्न सक्ने व्यवहारिक पक्षलाई तालिममा समावेश गरिएको जानकारी दिनुभयो । कार्यक्रममा नेपाल अपाङ्गता महिला सङ्घको अध्यक्ष तारा दाहालले अपाङ्गता भएकाप्रति समाज अझै पनि सकारात्मक हुन नसकेको बताउनुभएको हो  ।

उहाँले प्रदेशका कास्की, तनहुँ, म्याग्दी, गोर्खा जिल्लाका अपाङ्गता भएका महिला तथा सरोकारवालाका लागि पहुँचयुक्त आघात व्यवस्थापन र मनोपरामर्शसम्बन्धी तालिम प्रदान गरेर उनीहरुको पीडालाई कम गर्ने तालिम उद्देश्य रहेको जानकारी दिनुुभएको हो  ।

नेपालमा भूकम्प र कोभिड पछाडि मानसिक स्वास्थ्यमा धेरै समस्या देखिएको र यसलाई अझै पनि समाजले समस्याको रुपमा लिन नसक्दा विकराल रुप लिँदै गएको उहाँको भनाइ रहेको थियो ।

तालिममा राष्ट्रिय अपाङ्गता महासङ्घ अनुशासन आयोगका सदस्य लोचना अधिकारीले समाजमा अपाङ्गता भएका महिलाले विभिन्न खाले हिंसा भोगिरहेको तर त्यसलाई बाहिर ल्याउन सहज वातावरण नहुँदा पीडा लिएर बाँच्न बाध्य भएको बताउनुभएको छ । तालिममा प्रदेशमा चार जिल्लाका ३० जनाको सहभागिता रहेको सङ्घका गण्डकी प्रदेशका श्रोत व्यक्ति गङ्गा देवकोटाले जानकारी दिनुभएको हो  ।