काठमाडौँ । देशका विभिन्न जिल्लामा प्रहरीले गरेको नियमित गस्ती तथा विशेष निगरानीका क्रममा लागुऔषधसहित १३ जना पक्राउ परेका छन्।

केन्द्रीय प्रहरी कक्षका अनुसार काठमाडौँ, झापा, रुपन्देही, सुनसरी र कञ्चनपुर जिल्लाका विभिन्न स्थानबाट उनीहरूलाई नियन्त्रणमा लिइएको हो। प्रहरीले उनीहरूबाट गाँजा, खैरो हिरोइन तथा चिकित्सकको सिफारिसमा मात्र खरिद–बिक्री गर्न पाइने विभिन्न प्रकारका औषधिहरू बरामद गरेको जनाएको छ।

प्रहरीका अनुसार लागुऔषध ओसारपसार तथा कारोबार भइरहेको भन्ने सूचनाका आधारमा गरिएको निगरानी र चेकजाँचका क्रममा ती व्यक्तिहरू पक्राउ परेका हुन्। पक्राउ परेकाहरूलाई सम्बन्धित जिल्ला प्रहरी कार्यालयमा राखी थप अनुसन्धान भइरहेको छ।

लागुऔषध नियन्त्रण तथा अवैध कारोबार रोकथामका लागि देशभर नियमित गस्ती, चेकजाँच र विशेष अभियानलाई अझ कडाइका साथ सञ्चालन गरिएको प्रहरीले जनाएको छ।