ललितपुरको सातदोबाटेनजिकै चापागाउँ दोबाटोबाट रिङ्रोड बाहिरिने सडक सुरु हुन्छ । उक्त सडकको करिब दुई किलोमिटर क्षेत्र फराकिलो र चिल्लो पारिएको छ । ढोलाहिटी हुँदै सुनाकोठी चोकसम्म सडक कालोपत्रे भएको छ । जब सुनाकोठीको गेट आउँछ, त्यहाँबाट दक्षिण तर्फको सडकको अवस्था बेहाल छ ।

सदकभरि खाल्डाखुल्डी मात्रै छन् । त्यहि सडकमा सवारीसाधन गुड्दा आपसमा निसासिने गरी धुलो उडिरहन्छ । अत्यधिक धुलोका कारण सुनाकोठी र ठेचोका स्थानीयले पसलका स्तर बन्द गरेर बसेका छन् । धुलो र खाल्डाखुल्डका कारण सडकमा पैदल समेत हिंड्न सकिने अवस्था छैन । सुनाकोठी, ठेचो हुँदै चापागाउँ प्रहरी वृत्तसम्म सडक भत्किएको छ । साँघुरो सडकमा खाल्डाखुल्डी मात्रै छन् ।

तर, प्रधानमन्त्री शेरबहादुर देउवा गोदावरी नगरपालिकाको भवन उद्घाटन गर्न जाने भएपछी गोदावरी नगरपालिकानजिकैको भित्री सडक भने गएराति कालोपत्रे गरिएको छ . प्रधानमन्त्री त्यहाँ आउने भएपछि रातारात सडक कालोपत्रे गरिएको हो ।

‘प्रधानमन्त्री नगरपालिकाको भवन उद्घाटनमा आउने भएपछी रातारात नगरपालिकाले पुरा गरेको थिएन,’ सुनाकोठीका राकेश महर्जनले भने ।

ललितपुर महानगरपालिका-२७  वडाका वडाध्यक्ष बाबुराज महर्जनले सडक फराकिलो पार्ने र कालोपत्रे गर्ने  योजनामा माथिल्लो निकायले चासो नदिंदा समस्या हुँदै आएको बताए । उनले प्रधानमन्त्रीको अचानक त्यस क्षेत्रमा आगमन हुने भएपछि भत्किएको र खाल्डाखुल्डी सडकलाई केहि मर्मत गरिएको बताए ।

सडकको ठुला खाल्डाहरु पुरिएको छ । कतिपय ठाउँमा कालोपत्रे गरिएको छ । ‘वडा कार्यालय अगाडिको सडक बेहाल छ । मैले चार वर्षदेखि चारेरा पनि उक्त सडक बनाउन सकिनँ,’ उनले भने, ‘माथिल्लो तहका नेतालाई त नटेर्ने ठेकेदारले वडाध्यक्षलाई कहाँ टेर्थे ?’ उनले प्रधानमन्त्री आउने भएपछी सुनाकोठी देखि बज्रबाराही सम्मको सडक सहज बनाएको बताए ।

गोदावरी नगरपालिकाको नवनिर्मित बवन बज्रबाराहीमा पर्छ । सो क्षेत्रमा चापागाउँ क्षेत्र हुँदै त्यहि खाल्डाखुल्डी परेको सडकबाट प्रधानमन्त्री प्रस्थान गर्नेछन् । तर, प्रधानमन्त्रीको सवारी हुने भएपछि उक्त सडक गएराति केहि मर्मत गरिएको छ ।

सुनाकोठीदेखि ठेचोसम्म ग्राभेल बिछ्याइएको छ । चापागाउँ क्षेत्रमा पनि भत्किएको र खाल्डाखुल्डी परेको सडकमा माटो राखेर सम्मो पारिएको छ । मुख्य सडकमा खाल्डाखुल्डी भएपछित्यसलाई हतारहतार ढाकछोप गर्न गोदावरीले गएराति डोजर प्रयोग गरेको थियो । नगरपालिकाले चापागाउँ हुँदै बज्रबाराही जाने भित्री करिब डेढ किलोमिटर सडक भने गएराती कालोपत्रे गरेको छ ।

दिउँसो करिब ३ बजे प्रधानमन्त्री त्यस क्षेत्रमा पुग्ने कार्यक्रम रहेको ललितपुर प्रहरीले जनाएको छ । प्रधानमन्त्रीको आगमन हुने भएकोले गोदावरी क्षेत्रको केहि सडक रातारात कालोपत्रे भएको महानगरीय प्रहरी वृत्त चापागाउँका डीएसपी द्वारिका घिमिरेले जानकारी दिए । उनका अनुसार प्रधानमन्त्री त्यस क्षेत्रमा पुगेर भवन उद्घाटन गरेर फर्कनेछन् । प्रधानमन्त्री पुग्ने भएपछी चापागाउँ क्षेत्रको सुरक्षा अवस्था पनि कडा पारिएको ललितपुर प्रहरीले जनाएको छ . सुनाकोठी-ठेचो-चापागाउँ सडक बिग्रिएको चार वर्ष बित्यो । खाल्डाखुल्डी, हिलाम्मे र धुलाम्मे हुँदा पनि यो सडक सरकारी निकायले व्यवस्थित गर्न चासो दिएका छैनन् । उपत्यकालाई हेटौंडासँग जोड्ने कान्तिलोकपथ पनि यहि सदकखण्ड भित्र पर्छ ।

यहि सडक हुँदै हेटौडा जोडिने कान्तिलोकपथ सडक निर्माण कार्य भैरहेको छ । तर, मुख्य बस्ती र सहरी क्षेत्रमा भने सडक निकै साँगुरो छ । ठेकेदार कै कमजोरीले जनघनत्व बढी भएको क्षेत्रको सडक बेहाल अवस्थामा रहेको ठेचो-चापागाउँ सडक संघर्ष समितिका संयोजक शेखर न्यौपानेले बताए । उनका अनुसार सडक बिग्रिएपछि ओहोरदोहोरमा निकै समस्या हुने गरेको छ । त्यस्तै, सडक साँगुरो हुँदा बिहान र बेलुकी कार्यालय समयमा ट्राफिक जाम हुने गरेको छ ।

सुनाकोठी-ठेचो-चापागाउँ सडक बनाउने जिम्मा काठमान्डौ उपत्याका सडक विस्तार आयोजनाको हो । आयोजनाले ढोलाहिटी-सुनाकोठी-चापागाउँ सडक दुई खण्ड विभानन गरेर यो सडक निर्माण गर्न ठेकेदार कम्पनीलाई ठेक्का लगाएको थियो ।

तर, दुईवर्षको अवधिमा सक्ने गरी ०७३ मा ठेक्का दिईएको ठेक्का अझै सकिएको छैन । सडकखण्ड मर्मत र कालोपत्रेको जिम्मेवारी पाएको दिवा/शैलुंग  जेभी र कन्टेक प्रालिले सडक मर्मत गर्न अटेर गर्दै आइरहेको छ ।

गोदावरी नगरपालिकाका मेयर गजेन्द्र महर्जनका अनुसार उक्त सडक ०७५ कार्तिक मसान्तभित्र निर्माण सम्पन्न भैसक्नुपर्ने हो । तर, ठेकेदार कम्पनले स्थानीय जनप्रतिनिधिलाई समेत अटेर गरेको मेयर महर्जनले बताए । ‘यो क्षेत्रमा घर भत्काएर सडक फराकिलो पार्नुपर्ने हुन्छ, त्यो चाहिं अफ्ठेरो काम हो,’ उनले भने, ‘तर, ठेकेदारले सामान्य कालोपत्रे गर्ने कार्यलाई समेत आलटाल गर्दा जनप्रतिनिधिले गाली खानुपर्यो ।’