स्थानीय तह निर्वाचनका लागि निर्वाचन आयोगले ल्याएको आचारसंहितालाई लिएर प्रमुख प्रतिपक्षी नेकपा (एमाले) असन्तुष्टि जनाएको छ । एमालेका उपमहासचिव विष्णु रिमालले  निश्चित राजनीतिक दललाई लक्षित गरेर आचारसंहिता तयार पारिएको भन्दै असन्तुष्टि जनाएका हुन् ।

एकातिर जनप्रतिनिधिविहीन स्थानीय तह हुँदैन भन्ने निर्वाचन आयोगले अर्कोतिर २ महिना पहिल्यै राजीनामा गर्नुपर्ने कुरामा विरोधाभाष रहेको रिमालको भनाइ थियो । ‘एमालेले यसअघि बढी स्थानीय तह जितेको छ भनेर पूर्वाग्रह स्वरुप यी कुरा राखियो । उनले एमालेले धेरै स्थानीय तह जितेकाले आचारसंहितामा त्यस्तो कुरा उल्लेख गरिएको दाबी गरे । दल हेरेर आचारसंहिता तयार गर्ने होइन,’ उनले भने ।

रिमालले सामाजिक सञ्जालमा पनि आयोगको आचारसंहिताको विषयलाई लिएर आयोगप्रति प्रश्न उठाएका छन् । उनले लेखेका छन्, निर्वाचनमा जाँदा पदको दुरुपयोग नहोस्, सोच्नु पर्ला । तर यसलाई देखाएर काम नै रोक्नु कसरी ठीक हुन्छ ?’  ‘प्रधानमन्त्रीले चुनाव लड्दा पद खाली गर्नु पर्दैन । स्थानीय तहका “प्रधानमन्त्री” पालिका अध्यक्ष वा मेयरहरूले चाहिँ चुनावमा जानुअघि पद खाली गरी जनतालाई दिनुपर्ने सेवा नै बन्द गर्नु पर्ने किन ?